មហាជនអ្នកប្រើប្រាស់បណ្ដាញសង្គម នាពលថ្មីៗនេះ បាននាំគ្នាសម្ដែងក្ដីសោកសង្រេងមួយ ដែលក្មេងប្រុសអាយុទើបតែ ៥ ឆ្នាំម្នាក់ ត្រូវបានស្ត្រីជាម្ដាយមីងបង្ហោះថា រូបគេបានបាត់បង់ជីវិតចោលគ្រួសារគួរឱ្យសោកស្ដាយបំផុត ក្រោយដកធ្មេញម្ដង ៧ គ្រាប់។
ទាក់ទិននឹងករណីនេះ នៅថ្ងៃទី ៣១ ខែមីនា ឆ្នាំ ២០២៣ ខាងមន្ទីរពេទ្យកុមារអង្គរ បានចេញសេចក្តីបំភ្លឺព័ត៌មាន អំពីករណីអ្នកជំងឺកុមារ ភេទប្រុស អាយុ ៥ ឆ្នាំ បានបាត់បង់ជីវិតដោយសារជំងឺបួសជើងធ្មេញ និងជំងឺ មហារីកគ្រាប់ឈាម។
ខាង មន្ទីរពេទ្យកុមារអង្គរ បានធ្វើការស្រាយបំភ្លឺថា កុមារជាអ្នកជំងឺនេះ ត្រូវបានអាណាព្យាបាលនាំមកទទួលការព្យាបាលនៅមន្ទីរពេទ្យកុមារអង្គរ នៅថ្ងៃទី ១៦ ខែមីនា ឆ្នាំ ២០២៣ ដោយមានអាការៈឈឺធ្មេញ ហើមធ្មេញ និងហើមចង្ការទាំងសងខាងរយៈពេល ២ សប្តាហ៍ កន្លងមកហើយ។ កុមារបានទទួលការព្យាបាលដោយ ផ្តល់ថ្នាំផ្សះ និងថ្នាំបំបាត់ការឈឺចាប់រយៈពេល ២ ថ្ងៃ នៅផ្នែកសុខភាពមាត់ធ្មេញនៃមន្ទីរពេទ្យកុមារអង្គរ។ ការឈឺធ្មេញនេះ មិនបានធូរស្រាលហើយកុមារ ត្រូវបាននាំមកមន្ទីរពេទ្យវិញនៅថ្ងៃទី ១៨ ខែមីនា ឆ្នាំ ២០២៣ ដើម្បីចូលសម្រាកព្យាបាលនៅក្នុងមន្ទីរពេទ្យ និងទទួលការព្យាបាលជំងឺបូសធ្មេញជាប្រចាំថ្ងៃ ដោយប្រើថ្នាំផ្សះ ការចាក់តាមសរសៃ និងថ្នាំបំបាត់ការឈឺចាប់។
លុះដល់ថ្ងៃច័ន្ទ ទី ២០ ខែមីនា ឆ្នាំ ២០២៣ វេជ្ជបណ្ឌិតឯកទេសធ្មេញបានធ្វើការពិនិត្យឃើញថា កុមារមានបួសលើជើងធ្មេញចំនួន ៥ ធ្មេញ ដែលធ្មេញទាំងអស់នេះរង្គើជិតជ្រុះ និងមានធ្មេញខាងលើពីរទៀតក៏រង្គើជិតជ្រុះផងដែរ (ធ្មេញទាំងអស់នេះគឺសុទ្ធសឹងតែជាធ្មេញព្រៃ)។ ខាងមន្ទីរពេទ្យបញ្ជាក់ថា ជំងឺបួសជើងធ្មេញនេះមានសភាពធ្ងន់ធ្ងរដែលត្រូវធ្វើការព្យាបាលដោយការដកធ្មេញ ដែលមានផ្ទុះជើងធ្មេញចេញដោយការដាក់ថ្នាំសណ្តំឱ្យអ្នកជំងឺសន្លប់ក្នុង បន្ទប់វះកាត់។ ចំពោះស្ថានភាពធ្មេញទាំងនេះ គឺនឹងត្រូវជ្រុះដោយខ្លួនឯងឆាប់ៗទោះបីជាមិនធ្វើការដក ចេញក៏ដោយ។
ក្នុងករណីនេះ ប្រសិនបើមិនធ្វើការដកធ្មេញឱ្យបានឆាប់ទេ កុមារអាចប្រឈមទៅនឹងជំងឺ មួយចំនួនដូចខាងក្រោមដែលអាចប៉ះពាល់ធ្ងន់ធ្ងរដល់អាយុជីវិត៖
– រលាកឆ្អឹងចង្ការ
– មានជំងឺមេរោគក្នុងឈាមធ្ងន់ធ្ងរ
– រលាកស្រោមខួរ
– រលាកសាច់ដុំបេះដូង
ខាងមន្ទីរពេទ្យបន្តថា ក្នុងពេលសម្រាកពេទ្យ ក្រុមវេជ្ជបណ្ឌិតនៃមន្ទីរពេទ្យកុមារអង្គរដែលរួមមានវេជ្ជបណ្ឌិត ឯកទេសជំងឺកុមារ វេជ្ជបណ្ឌិតឯកទេសចក្ខុរោគ វេជ្ជបណ្ឌិតឯកទេសសរសៃប្រសាទ វេជ្ជបណ្ឌិតវះកាត់ វេជ្ជបណ្ឌិតឯកទេសជំងឺមហារីក និងវេជ្ជបណ្ឌិតឯកទេសតម្រងនោម ដោយមានការពិគ្រោះយោបល់ពី វេជ្ជបណ្ឌិតឯកទេសផ្នែកជំងឺមហារីកមកពីសហរដ្ឋអាមេរិក។
ជាចុងក្រោយក្រុមវេជ្ជបណ្ឌិតនៃមន្ទីរពេទ្យកុមារអង្គរទាំងអស់ បានអះអាងប្រកបដោយភាពជឿជាក់ ថាបានធ្វើការយ៉ាងយកចិត្តទុកដាក់ប្រកបដោយវិជ្ជាជីវៈត្រឹមត្រូវតាមក្បួនវេជ្ជសាស្ត្រ និងបានធ្វើការ ប្រឹក្សាអំពីបច្ចុប្បន្នភាពនៃស្ថានភាពជំងឺជាប្រចាំដល់អាណាព្យាបាល និងទទួលបាននូវការអនុញ្ញាតពីអាណាព្យាបាលកុមារ ធ្វើការវិភាគវេជ្ជសាស្ត្រ ធ្វើស៊ីធីស្កេន ធ្វើការច្រឹបខួរឆ្អឹង ធ្វើការបូមឈាម ធ្វើការថត សួត ធ្វើការថតពោះ ធ្វើការច្រឹបសាច់នៅករបស់អ្នកជំងឺ ដើម្បីធ្វើរោគវិនិច្ឆ័យ និងបានរកឃើញថា កុមារមានជំងឺមហារីកគ្រាប់ឈាម ហើយបានរីករាលដាលទៅដល់សរីរាង្គជាច្រើនពាសពេញរាងកាយ ដូចជា ថ្លើម តម្រងនោម ពោះវៀន កូនកណ្តុរក្រោមថ្គាម ឆ្អឹងថ្គាម និងរាលទៅដល់ខួរក្បាលទៅហើយ។ ដូច្នេះកុមារមានសភាពជំងឺធ្ងន់ធ្ងរខ្លាំង ដែលជាប្រភេទជំងឺមិនអាចព្យាបាលឱ្យជាសះស្បើយបានឡើយ ដែល ទោះបីជាក្រុមវេជ្ជបណ្ឌិតរបស់មន្ទីរពេទ្យកុមារអង្គរ បានខិតខំប្រឹងប្រែងតាមវិជ្ជាជីវៈវេជ្ជសាស្ត្រ និង អស់ពីលទ្ធភាពហើយក៏ដោយ៕ អត្ថបទ៖ ប្រជាប្រិយ
សូមអានសេចក្ដីលម្អិតនៅខាងក្រោម ៖
