ថ្មីៗនេះ មហាជនអ្នកប្រើប្រាស់បណ្ដាញសង្គម កំពុងបញ្ចេញយោបល់វែកញែកទៅលើការស្លៀកពាក់របស់អ្នកច្នៃម៉ូដ ឯម រៀម ក្រោយលោកតុបតែងខ្លួនជាមួយឈុតហូលផាមួងច្នៃពាក់កណ្ដាលខ្លួន បញ្ចេញសាច់ទ្រូង នៅក្នុងកម្មវិធីកម្រាលព្រំក្រហម Pleng Music Award 2023 នៅថ្ងៃទី ១៨ ខែមីនា ឆ្នាំ ២០២៣។
ក្រោយមានការវែកញែកស្អេកស្កះ ដោយមានទាំងមតិសរសើរ និង រិះគន់ ពេលនេះឯកឧត្តម ហ៊ុន ម៉ានី បានចូលរួមបញ្ចេញមតិថា ៖ «ខ្ញុំបានតាមដានយ៉ាងយកចិត្តទុកដាក់នូវការផ្លាស់ប្តូរយោបល់គ្នាក្នុងចំណោមសាធារណជន ស្តីពីការបង្ហាញខ្លួនរបស់លោក ឯម រៀម ក្នុងរូបភាពសម្លៀកបំពាក់ (ដោយច្នៃចេញពីហូលខ្មែរ) បែបពាក់កណ្តាលខ្លួនក្នុងកម្មវិធីពានរង្វាន់ Pleng Music Award ឆ្នាំ ២០២៣។ ខ្ញុំផ្ទាល់យល់ថា ការបញ្ចេញទស្សនៈទាំងនោះ ពិតជាមានតម្លៃ ប៉ុន្តែយើងមិនគួរឱ្យការបញ្ចេញយោបល់ទាំងនោះ ក្លាយជាទំនាស់ ការរឹតត្បិត ឬ ការបែកបាក់ណាមួយក្នុងសង្គមយើងឡើយ»។
លើសពីនេះ ឯកឧត្តមក៏បានបន្តទៀតថា ៖ «ក្នុងន័យនេះ ខ្ញុំសូមស្នើឱ្យសាធារណជន មេត្តាចៀសវាងនូវការខ្វែងយោបល់គ្នានេះ ដោយគួរត្រឡប់មកស្វែងយល់បន្ថែមពីជំហរ និង ភាពផ្សេងគ្នានៃគំនិត។ ជាមួយគ្នានេះ ខ្ញុំក៏សង្ឃឹមដែរថា អាជ្ញាធរមានសមត្ថកិច្ច និង អ្នកពាក់ព័ន្ធទាំងអស់ ជាពិសេសក្រសួងសេនាធិការ អ្នករៀបចំកម្មវិធី រួមទាំងបុគ្គល ដែលជាកម្មវត្ថុផ្ទាល់ នឹងសហការសម្របសម្រួលលើកិច្ចការនេះ ដើម្បីរកចំណុចរួម ដែលជាប្រយោជន៍សម្រាប់ជាតិយើងទាំងអស់គ្នា»៕
អត្ថបទ៖ ប្រជាប្រិយ
